പ്രതിമാസം കുറഞ്ഞ നിരക്കിലുള്ള അണ്‍ലിമിറ്റഡ് ഡേറ്റ പ്ലാനുകള്‍ ഇന്ത്യയില്‍ അവതരിപ്പിക്കാനൊരുങ്ങി ഇലോണ്‍ മസ്‌കിന്റെ സ്റ്റാർലിങ്ക് ഉള്‍പ്പെടെയുള്ള സാറ്റലൈറ്റ് കമ്മ്യൂണിക്കേഷൻ സ്ഥാപനങ്ങള്‍.
ഇതിലൂടെ പത്ത് ഡോളറിന് താഴെ, ഏകദേശം 840 രൂപയ്ക്ക് കീഴില്‍ അതിവേഗതയിലുള്ള അണ്‍ലിമിറ്റഡ് ഡേറ്റ പ്ലാനുകള്‍ ഇന്ത്യയില്‍ ലഭ്യമാകുമെന്ന് ദി ഇക്കണോമിക് ടൈംസ് റിപ്പോർട്ട് ചെയ്തു.
ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്) ഇന്ത്യയില്‍ ഈ സേവനം തുടങ്ങുന്നതിനായി വലിയ ഫീസ് സാറ്റലൈറ്റ് കമ്മ്യൂണിക്കേഷൻ സ്ഥാപനങ്ങളില്‍ നിന്ന് ഈടാക്കാൻ നീക്കമുണ്ടെങ്കിലും വിപണിയുടെ വലിപ്പം മുന്നില്‍ കണ്ട് കമ്ബനികള്‍ പിന്മാറില്ലെന്നാണ് സൂചന.
മൊത്തവരുമാനത്തില്‍ നിന്ന് നാല് ശതമാനം ലെവിയും, ഒരു മെഗാഹെട്സ് സ്പെക്‌ട്രത്തിന് കുറഞ്ഞത് 3,500 രൂപ വാർഷിക ഫീസും ട്രായ് കമ്ബനികള്‍ക്ക് വെച്ച മാനദണ്ഡങ്ങളിലുണ്ട്. കൂടാതെ വാണിജ്യ സേവനങ്ങള്‍ വാഗ്ദാനം ചെയ്യുന്നതിന് ഉപഗ്രഹ ആശയവിനിമയ ദാതാക്കള്‍ 8 ശതമാനം ലൈസൻസ് ഫീസും ട്രായിക്ക്‌ നല്‍കേണ്ടതുണ്ട്. പദ്ധതി നടപ്പിലാക്കുന്നതിന് മുമ്ബ് ഈ നിർദ്ദേശങ്ങള്‍ സർക്കാരിന്റെ അന്തിമ അംഗീകാരത്തിനായി കാത്തിരിക്കുകയാണ്.
അതേസമയം വിലക്കുറവ് ഉണ്ടെങ്കിലും പരിമിതമായ ഉപഗ്രഹ ശേഷി സ്റ്റാർലിങ്കിന്റെ വേഗത്തിലുള്ള വളർച്ച തടയുമെന്ന് വിദഗ്ധർ പറയുന്നു. ഐഐഎഫ്‌എല്‍ റിസർച്ചിന്റെ കണക്കനുസരിച്ച്‌ സ്റ്റാർലിങ്കിന്റെ നിലവിലെ 7,000 ഉപഗ്രഹങ്ങള്‍ക്ക് ആഗോളതലത്തില്‍ ഏകദേശം 4 ദശലക്ഷം ഉപയോക്താക്കള്‍ക്ക് സേവനം നല്‍കാനുള്ള ശേഷിയാണ് ഉള്ളത്. 8,000 ഉപഗ്രഹങ്ങളിലേക്ക് ഇവ വികസിപ്പിച്ചാലും, 2030 സാമ്ബത്തിക വർഷത്തോടെ ഏകദേശം 1.5 ദശലക്ഷം ഇന്ത്യൻ ഉപഭോക്താക്കള്‍ക്ക് മാത്രമേ സേവനം നല്‍കാൻ കഴിയൂ എന്നും റിപ്പോർട്ട് പറയുന്നു.
