കേരളത്തിൽ നിന്നുള്ള ബൈജു തിട്ടാല എന്ന സാധാരണക്കാരനായ കുടിയേറ്റക്കാരൻ, ബ്രിട്ടന്റെ പൗരാണിക അക്ഷരനഗരിയായ കേംബ്രിഡ്ജിന്റെ നഗരപിതാവായി മാറിയ കഥ. ഒടുവിൽ കാലാവധി പൂർത്തിയാക്കി മേയർ പദവി ഒഴിയുമ്പോൾ, ബൈജു നടത്തിയ വിടവാങ്ങൽ പ്രസംഗവും ഇപ്പോൾ കുടിയേറ്റക്കാർക്കും തദ്ദേശീയർക്കും ഇടയിൽ ഏറെ ചർച്ച ചെയ്യപ്പെടുന്നു. യുകെയിലെ തദ്ദേശീയർക്കൊപ്പം ചേർന്നു നിന്ന് കുടിയേറ്റക്കാരുടെ പങ്കാളിത്തത്തോടെ പടുത്തുയർത്തിയതാണ് ആധുനിക ഇംഗ്ലണ്ടും ഇന്നത്തെ കേംബ്രിജ് സിറ്റിയും ഇവിടുത്തെ സമൂഹവുമെന്ന് ബൈജു തിട്ടാല കൗൺസിൽ ഹാളിൽ നടത്തിയ വിടവാങ്ങൽ പ്രസംഗത്തിൽ പറഞ്ഞു. ഇന്ന് കുടിയേറ്റക്കാരുടെ എണ്ണം കുറയ്ക്കാൻ ബ്രിട്ടിഷ് സർക്കാർ ശ്രമിക്കുമ്പോൾ കുടിയേറ്റക്കാരുടെ സംഭാവനകൾ മറന്നുപോകരുതെന്നും ബൈജു തിട്ടാല ഓർമിപ്പിച്ചു. കേംബ്രിജ് മേയർ പദവി വരെ തനിക്ക് എത്താൻ കഴിഞ്ഞതും അതിന്റെ ഭാഗമായായാണെന്നും ഒരു കുടിയേറ്റക്കാരൻ എന്ന നിലയിൽ അഭിമാനിക്കുന്നുവെന്നും ബൈജു തിട്ടാല കൂട്ടിച്ചേർത്തു.കുടിയേറ്റക്കാർ ക്രിമിനലുകളാണെന്ന യാഥാസ്ഥിതിക സമൂഹത്തിന്റെ കാഴ്ചപ്പാടിന് ഇനിയും കൂടുതൽ മാറ്റം വരേണ്ടതുണ്ട്. കേംബ്രിജിലെ കുറ്റവാളികളിൽ കുടിയേറ്റക്കാർ വളരെ കുറവാണെന്ന കാര്യം യുകെയിലെ ക്രിമിനൽ സോളിസിറ്റർ എന്ന നിലയിലും നേരിട്ടറിയാം. നഴ്‌സായ ഭാര്യ ജോലിചെയ്യുന്ന കേംബ്രിജ് യൂണിവേഴ്‌സിറ്റി ആശുപത്രിയിയിൽ 90 രാജ്യങ്ങളിൽ നിന്നുള്ള കുടിയേറ്റക്കാർ ഒത്തൊരുമയോടെ ജോലിചെയ്യുന്നുണ്ട്.

ബ്രിട്ടിഷ് ജനതയുടെ സഹകരണത്തിന്റെയും സൗഹാർദ്ദത്തിന്റെയും കൂടി പ്രതിഫലനമാണ് ഈ നാടിന്റെ വികസത്തിനായുള്ള കുടിയേറ്റക്കാരുടെ മഹത്തായ സംഭാവനയുടെ അടിത്തറ. ഇത്തരം കാര്യങ്ങൾ കളങ്കപ്പെടാതെ മുന്നോട്ടു കൊണ്ടു പോകുവാൻ സർക്കാരിന് കഴിയണമെന്നും ബൈജു തിട്ടാല തന്റെ പ്രസംഗത്തിൽ കൂട്ടിച്ചേർത്തു. വിടവാങ്ങൽ പ്രസംഗത്തിൽ കുടിയേറ്റക്കരെ പിന്തുണയ്ക്കുന്ന ബൈജു തിട്ടാലയുടെ നയത്തെ ചോദ്യം ചെയ്ത് ചില യാഥാസ്ഥിതികരായ തദ്ദേശീയർ സമൂഹമാധ്യമങ്ങളിലൂടെ പ്രതിഷേധിച്ചതായി റിപ്പോർട്ട് ഉണ്ട്. ബൈജു തിട്ടാലയുടെ വിടവാങ്ങൽ പ്രസംഗം പ്രസിദ്ധീകരിച്ച കേംബ്രിജിലെ പ്രാദേശിക പത്രങ്ങളുടെ വെബ്സൈറ്റിലും മറ്റും നിരവധി തദ്ദേശീയർ കമന്റുകളിലൂടെ പ്രതിഷേധം രേഖപ്പെടുത്തി. എന്നാൽ മേയർ പദവിയിൽ നിന്നും പടിയിറങ്ങും മുൻപ് കൂടിയേറ്റക്കാർക്ക് അനുകൂലമായി തനിക്ക് പറയാനുള്ളത് എല്ലാം തുറന്നു പറഞ്ഞ ബൈജു തിട്ടാലയെ അഭിനന്ദിക്കുന്നവരും കുറവല്ല.

കോട്ടയം ജില്ലയിലെ ആർപ്പൂക്കര സ്വദേശിയായ ബൈജു തിട്ടാല മേയർ പദവിയിൽ ചുമതലയേറ്റത് ഒരു വർഷം മുൻപാണ്. ഡെപ്യൂട്ടി മേയർ ആയിരിക്കെയാണ് ലേബർ പാർട്ടി പ്രതിനിധിയായ ബൈജു തിട്ടാല മേയർ ആയി ചുമതലയേറ്റത്. കേംബ്രിജ് മേയറായിരിക്കെ ബൈജു തിട്ടാലയ്ക്ക് ഇറ്റലി ഓണററി പൗരത്വം നൽകി ആദരിച്ചിരുന്നു. കാസ്റെറല്ലൂസിയോ മുനിസിപ്പാലിറ്റി സംഘടിപ്പിച്ച ചടങ്ങിൽ ഇറ്റാലിയൻ പൗരത്വം മേയർ സർ പാസ്ക്വേൽ മാർഷെസ് ആണ് ബൈജു തിട്ടലയ്ക്ക് കൈമാറിയത്. ജോലി, വൈവിധ്യങ്ങളെ ഉയർത്തിപ്പിടിക്കുന്ന പ്രതിബദ്ധത, സാമൂഹിക നീതി നേടിയെടുക്കാനുള്ള അക്ഷീണമായ പോരാട്ടം എന്നിവയ്ക്കായിട്ടാണ് ഓണററി പൗരത്വം നൽകിയത്. കൂടാതെ സമീപകാലത്ത് ബ്രിട്ടനിലെ സിറ്റി കൗൺസിലുകളിൽ മേയറാകുന്ന ഏഴാമത്തെ മലയാളി കൂടിയാണ് ബൈജു തിട്ടാല. ഒരു സാധാരണക്കാരനായി യുകെയിലെത്തി സോളിസിറ്ററും കൗൺസിലറും ഒടുവിൽ മേയറുമായ ബൈജു തിട്ടാലയുടെ പ്രവർത്തനങ്ങൾക്ക് കുടുംബത്തിന്റെ പൂർണ്ണ പിന്തുണയുണ്ട്. ഭാര്യ: ആൻസി തിട്ടാല, മക്കൾ: അന്ന തിട്ടാല, അലൻ തിട്ടാല, അൽഫോൻസ് തിട്ടാല.

പതിറ്റാണ്ടുകൾ നീണ്ട തർക്കങ്ങൾക്കും ചർച്ചകൾക്കുമൊടുവിൽ ഇന്ത്യൻ മഹാസമുദ്രത്തിലെ കാഗോസ് ദ്വീപുകൾ മൊറീഷ്യസിന് വിട്ടു നൽകി ബ്രിട്ടൻ. ദ്വീപിലെ ബ്രിട്ടന്റെയും അമേരിക്കയുടെയും സംയുക്ത മിലിട്ടറി ബേസായ ഡീഗോ ഗ്രേഷ്യയുടെ നിയന്ത്രണം നിലനിർത്തിക്കൊണ്ടാണ് കൈമാറ്റ ഉടമ്പടി. പുതിയ ഉടമ്പടിയോടെ ഇന്ത്യൻ സമുദ്രത്തിലെ അറുപതിലേറെ വരുന്ന കാഗോസ് ദ്വീപുകൾ ബ്രിട്ടന്റെ പരമാധികാരത്തിൽനിന്നും മൊറീഷ്യസിന്റെ ഭാഗമായി മാറും. ദ്വീപുകളുടെ പരമാധികാരം വിട്ടുനൽകുമ്പോഴും ഇന്ത്യക്കും ചൈനയ്ക്കും അടുത്തുള്ള മിലിട്ടറി ബേസ് കാത്തുസൂക്ഷിക്കാൻ ബ്രിട്ടൻ പ്രത്യേകം ശ്രദ്ധിച്ചു. ബ്രിട്ടിഷ് നീവികസേനയുടെ നിരവധി യുദ്ധക്കപ്പലുകളും ബോംബർ എയർക്രാഫ്റ്റുകളും ഡീഗോ ഗ്രേഷ്യയിലുണ്ട്. ഇവയെല്ലാം അവിടെത്തന്നെ നിലനിർത്തും വിധമാണ് ഉടമ്പടി. 99 വർഷത്തേക്ക് നിലവിലെ സ്ഥിതി തുടരുന്ന വിധമാണ് ഉടമ്പടി വിഭാവനം ചെയ്തിട്ടുള്ളത്. ഇതിനായി ലീസ് കാലാവധി തീരുംവരെ ഓരോ വർഷവും ബ്രിട്ടൻ 101 മില്യൻ പൗണ്ട് മൊറീഷ്യസിന് നൽകും. മൊത്തത്തിൽ 3.4 ബില്യൻ പൗണ്ടിന്റെ ഉടമ്പടിയാണിത്.

മൊറീഷ്യസിന്റെ അടിസ്ഥാന സൗകര്യവികസനത്തിനും സാമൂഹിക ഉന്നമനത്തിനും ഉതകുന്ന സാമ്പത്തിക പാക്കേജും ഉടമ്പടിയുടെ ഭാഗമായുണ്ട്. 1968ൽ മൊറീഷ്യസിന് ബ്രട്ടനിൽനിന്നും സ്വാതന്ത്ര്യം ലഭിച്ചനാൾ മുതൽ കാഗോസ് ദ്വീപുകൾകൂടി മൊറീഷ്യസിന് വിട്ടുനൽകണമെന്ന ആവശ്യം നിലിൽക്കുന്നതാണ്. 2019ൽ ഇന്റർനാഷനൽ കോർട്ട് ഓഫ് ജസ്റ്റീസ് കാഗോസ് ദ്വീപുകൾ മൊറീഷ്യസിന് അവകാശപ്പെട്ടതാണെന്ന് വിധിച്ചിരുന്നു. 2021ൽ യുണൈറ്റഡ് നേഷൻസ് ജനറൽ അസംബ്ലിയും ഇത് ശരിവച്ചു. ഇതോടെയാണ് തുടർചർച്ചകളിലൂടെ ദ്വീപിന്റെ കൈമാറ്റത്തിന് ബ്രിട്ടൻ തയാറായത്.