പ്രമുഖ ബ്രിട്ടീഷ് ഇലക്ട്രോണിക്‌സ് കമ്പനിയായ നത്തിങ്, ഇതുവരെ പുറത്തിറങ്ങിയതില്‍ വച്ച് ഏറ്റവും വലിയ സ്മാര്‍ട്ട്‌ഫോണ്‍ ലോഞ്ചിനായി ഒരുങ്ങുന്നു. നത്തിങ് ഫോണ്‍ 3 എന്ന പേരില്‍ പുറത്തിറങ്ങുന്ന ഫോണിന്റെ ലോഞ്ച് കമ്പനി സ്ഥിരീകരിച്ചു. ജൂലൈയില്‍ ഫോണ്‍ വിപണിയില്‍ അവതരിപ്പിക്കുമെന്നാണ് കമ്പനി അറിയിച്ചത്. ഫോണിന് 90,000 രൂപയില്‍ കൂടുതല്‍ വില വരുമെന്നാണ് പ്രതീക്ഷ. ഫോണില്‍ ‘പ്രീമിയം മെറ്റീരിയലുകള്‍’ ഉണ്ടായിരിക്കുമെന്ന് കമ്പനി സ്ഥിരീകരിച്ചു. നത്തിങ്ങിന്റെ ‘ആദ്യത്തെ യഥാര്‍ത്ഥ ഫ്ലാഗ്ഷിപ്പ്’ സ്മാര്‍ട്ട്‌ഫോണ്‍ ആയിരിക്കും ഇതെന്നാണ് കമ്പനി വിശേഷിപ്പിക്കുന്നത്. നത്തിങ് നേരത്തെ പുറത്തിറക്കിയ ഫോൺ 3എ പ്രോ, സിഎംഎഫ് ഫോൺ 2 ഫോണുകളിൽ ട്രിപ്പിൾ ക്യാമറയാണുള്ളത്. നത്തിങ് ഫോൺ 2 ൽ ഡ്യുവൽ ക്യാമറയാണ് ഉണ്ടായിരുന്നത്.
നത്തിങ് ഫോൺ 3 യിൽ 5000 എംഎഎച്ചിൽ കൂടുതൽ ബാറ്ററിശേഷിയുണ്ടാകുമെന്നാണ് പ്രതീക്ഷിക്കുന്നത്. ഫോൺ 2 ൽ 4700 എംഎഎച്ച് ബാറ്ററിയാണുള്ളത്. നത്തിങ് ഫോൺ 3എ പ്രോ, സിഎംഎഫ് ഫോൺ 2 എന്നിവയിൽ 5000 എംഎഎച്ച് ബാറ്ററിയുണ്ട്.ആൻഡ്രോയിഡ് 15 അധിഷ്ഠിതമായ ഒഎസിൽ ആയിരിക്കും ഫോൺ എത്തുക. പിന്നീട് ആൻഡ്രോയിഡ് 16 ലേക്ക് അപ്ഡേറ്റ് ചെയ്യാനാവും. നേരത്തെ സൂചിപ്പിച്ച പോലെ കൂടിയ വിലയ്ക്കാവും നത്തിങ് ഫോൺ 3 വിപണിയിലെത്തുക. ഫോണിന് ഏകദേശം 800 യൂറോ വിലയുണ്ടാകുമെന്ന് കാൾ പെയ് വ്യക്തമാക്കിയിട്ടുണ്ട്. ഇത് ഏകദേശം 76000 ൽ ഏറെ രൂപ വരും. 44999 രൂപയ്ക്കാണ് നത്തിങ് ഫോൺ 2 പുറത്തിറക്കിയത്.
