വൈഭവ് തനേജ, കഴിഞ്ഞ കുറച്ച്‌ ദിവസങ്ങളായി ഇന്ത്യൻ ടെക് ലോകം ചർച്ച ചെയ്യുന്ന പേരുകളില്‍ ഒന്നാണിത്. 2023 മുതല്‍ ടെസ്ലയുടെ ചീഫ് ഫിനാൻഷ്യല്‍ ഓഫീസറായ ഈ ഇന്ത്യക്കാരൻ കഴിഞ്ഞ വർഷം വാങ്ങിയ ശമ്ബളം 139.5 മില്യണ്‍ യുഎസ് ഡോളറാണ്.
അതായത് 1200 കോടിയോളം ഇന്ത്യൻ രൂപ. 2024ല്‍ ഗൂഗിള്‍ സുന്ദർ പിച്ചൈക്ക് ലഭിച്ച ശമ്ബളം 91 കോടി. മൈക്രോസോഫ്റ്റ് സത്യ നദല്ലയ്ക്ക് നല്‍കിയത് 675 കോടി. ഈ തുകയേക്കാള്‍ എത്രയോവലുതാണ് 49കാരൻ വൈഭവ് സ്വന്തമാക്കിയത്. ഇതോടെ ഇന്ത്യൻ ടെക് ലോകത്ത് ആരാണ് വൈഭവ്? എന്താണ് വൈഭവിന്റെ ജോലി എന്നൊക്കെയുള്ള ചർച്ചകളാണ് നടക്കുന്നത്.
ആരാണ് വൈഭവ് തനേജ?
ഇന്ത്യയില്‍ ജനിച്ച വൈഭവ് 2017ല്‍ ആണ് ടെസ്ലയില്‍ എത്തുന്നത്. ഡല്‍ഹി സർവ്വകലാശാലയില്‍ നിന്ന് 1999ല്‍ ആണ് വൈഭവ് ബിരുദം പൂർത്തിയാക്കുന്നത്. ഇൻസ്റ്റിറ്റിയൂട്ട് ഓഫ് ചാർട്ടേഡ് അക്കൗണ്ടന്റ്സ് ഓഫ് ഇന്ത്യയില്‍ നിന്ന് ചാർട്ടേഡ് അക്കൗണ്ടൻസിയും 2006ല്‍ സർട്ടിഫൈഡ് പബ്ലിക് അക്കൗണ്ടന്റും പൂർത്തിയാക്കി. 2016 ല്‍ ടെസ്ല ഏറ്റെടുത്ത സോളാർസിറ്റി എന്ന സോളാർ എനർജി കമ്ബനിയില്‍ നിന്നുമാണ് 2017 ല്‍ വൈഭവ് ടെസ്ലയില്‍ ചേർന്നത്. അവിടെ അദ്ദേഹം ആദ്യം വൈസ് പ്രസിഡന്റായും പിന്നീട് കോർപ്പറേറ്റ് കണ്‍ട്രോളറായും സേവനമനുഷ്ഠിക്കുകയും രണ്ട് കമ്ബനികളുടെയും അക്കൗണ്ടിംഗ് ടീമുകള്‍ക്ക് നേതൃത്വം നല്‍കുകയുമായിരുന്നു.
സോളാർ സിറ്റിയില്‍ ചേരുന്നതിന് മുമ്ബ്, പ്രൈസ് വാട്ടർഹൗസ് കൂപ്പേഴ്സില്‍ 17 വർഷത്തെ സേവനപരിചയം വൈഭവിനുണ്ടായിരുന്നു. അവിടെ അഷ്വറൻസ് സീനിയർ മാനേജരായാണ് പ്രവർത്തിച്ചത്. ടെസ്ല ഇന്ത്യ മോട്ടോഴ്സ് ആൻഡ് എനർജി പ്രൈവറ്റ് ലിമിറ്റഡിന്റെ ഡയറക്ടർ കൂടിയാണ് ഇപ്പോള്‍ വൈഭവ്. ഇന്ത്യയില്‍ ടെസ്ലയുടെ വിപുലീകരണത്തിന് നേതൃത്വം നല്‍കുന്നതും വൈഭവ് തന്നെയാണ്. ധനകാര്യം, അക്കൗണ്ടിംഗ്, ബഹുരാഷ്ട്രതലത്തിലെ പ്രവർത്തനങ്ങള്‍ എന്നിവയില്‍ രണ്ട് പതിറ്റാണ്ടിലേറെ പരിചയസമ്ബത്തുള്ള തനേജ, ടെസ്ലയുടെ സാമ്ബത്തിക തന്ത്രത്തിലും ആഗോള വളർച്ചയിലും ഒരു പ്രധാന പങ്ക് വഹിക്കുന്ന ഉദ്യോഗസ്ഥനാണ്.
