ധീരുഭായ് അംബാനിയുടെ രണ്ടുമക്കളില്‍ മൂത്തയാള്‍ മുകേഷ് അംബാനി ബിസിനസ് ശൃംഖലകള്‍ ശക്തമാക്കിയും വിപുലപ്പെടുത്തിയും ലോക സമ്ബന്നരുടെ മുൻനിരയില്‍ ഇടംപിടിച്ചപ്പോള്‍ അനില്‍ അംബാനിയുടെ തകർച്ച അവിശ്വസനീയതയോടെയാണ് വ്യവസായ ലോകം കേട്ടത്.
എന്നാല്‍, ഇപ്പോള്‍ അനില്‍ അംബാനിയുടെ കമ്ബനികള്‍ തിരിച്ചുവരവിന്റെ പാതയിലാണ്. മക്കളായ ജയ് അൻമോല്‍ അംബാനി, ജയ് അൻഷുല്‍ അംബാനി എന്നിവരാണ് തിരിച്ചുവരവിന് ചുക്കാൻ പിടിക്കുന്നത്. അവൻ കമ്ബനി ഘടനയില്‍ വലിയ മാറ്റം വരുത്തി. 2030 ഓടെ എല്ലാ കുരുക്കുകളില്‍നിന്നും ഊരി പുതിയ ഉയരങ്ങളിലെത്തിക്കാൻ പദ്ധതി തയാറാക്കി.
പ്രതിസന്ധി പരിഹരിക്കാൻ വൻതോതില്‍ ഫണ്ട് ലഭ്യമാക്കാൻ അവർ ഇടപെടല്‍ നടത്തി. പ്രിഫറൻഷ്യല്‍ ഇക്വിറ്റി ഓഹരികളിലൂടെ 4500 കോടി രൂപയും ബോണ്ടുകള്‍ വഴി 7100 കോടിയും നിക്ഷേപ സ്ഥാപനങ്ങളില്‍നിന്ന് 6000 കോടിയും സമാഹരിക്കാൻ അവർക്ക് കഴിഞ്ഞു. ഇത് നിക്ഷേപകരില്‍ ആത്മവിശ്വാസം വളർത്തുകയും ഓഹരിവിലയില്‍ കുറഞ്ഞ കാലം കൊണ്ട് വൻ കുതിപ്പുണ്ടാക്കുകയും ചെയ്തു.
അതോടൊപ്പം വലിയ ബിസിനസ് ഓർഡറുകള്‍ ലഭ്യമാക്കാനും കഴിഞ്ഞതോടെ അനില്‍ അംബാനി കരുത്തനായി തിരിച്ചുവരുന്നുവെന്ന വികാരം വിപണിയില്‍ ഉണ്ടായി. 2016ല്‍ റിലയൻസ് കാപിറ്റല്‍ ഡയറക്ടറായി ജയ് അൻമോല്‍ അംബാനി നിയമിതനായ ശേഷം റീട്ടെയില്‍ ബിസിനസില്‍ വൻ വളർച്ചയുണ്ടായി.
കടം കുറച്ചുകൊണ്ടുവരുന്നതിനാണ് ഇപ്പോള്‍ ഊന്നല്‍. കഴിഞ്ഞ ജനുവരിയില്‍ അനില്‍ അംബാനിയുടെ ഒരു കമ്ബനി 1286 കോടിയുടെ വായ്പ അടച്ചുതീർത്തു. വൻ കടക്കെണിയിലുള്ള കമ്ബനികള്‍ വില്‍ക്കാനും നീക്കമുണ്ട്. റിലയൻസ് പവറിന്റെ അനുബന്ധ കമ്ബനിയായ വിദർഭ ഇൻഡസ്ട്രീസ് പവർ ലിമിറ്റഡ് അദാനി ഗ്രൂപ്പിന് കൈമാറാൻ ചർച്ച നടക്കുന്നു. റിലയൻസ് ബിഗും വില്‍ക്കുമെന്നാണ് റിപ്പോർട്ട്.
ഏഷ്യയിലെ ഏറ്റവും വലിയ സിംഗിള്‍-ലൊക്കേഷൻ ഇന്റഗ്രേറ്റഡ് സോളാർ ആൻഡ് ബാറ്ററി എനർജി സ്റ്റോറേജ് സിസ്റ്റം സ്ഥാപിക്കാൻ അനില്‍ അംബാനിയുടെ ഉടമസ്ഥതയിലുള്ള റിലയൻസ് പവറിന്റെ അനുബന്ധ സ്ഥാപനമായ റിലയൻസ് എൻ‌യു സണ്‍ടെക്, സോളാർ എനർജി കോർപറേഷൻ ഓഫ് ഇന്ത്യയുമായി കഴിഞ്ഞ മാസം 25 വർഷത്തെ കരാറില്‍ ഒപ്പുവെച്ചു. 10,000 കോടി രൂപ മുതല്‍മുടക്കില്‍ സ്ഥാപിക്കുന്ന പദ്ധതി 24 മാസത്തിനുള്ളില്‍ പൂർത്തിയാക്കാനാണ് ഉദ്ദേശിക്കുന്നത്.
പ്രതിരോധ മേഖലയില്‍ പുതിയ കുതിപ്പിന് ഒരുങ്ങുകയാണ് റിലയൻസ് ഡിഫൻസ്. ജർമൻ ആയുധ നിർമാതാക്കളായ റൈൻമെട്ടോളിനുവേണ്ടി ആർട്ടിലറി ഷെല്ലുകളും വെടിക്കോപ്പുകളും നിർമിച്ചു നല്‍കാനുള്ള കരാറില്‍ റിലയൻസ് ഡിഫൻസ് ഒപ്പുവെച്ചു. അനില്‍ അംബാനിയുടെ റിലയൻസ് ഇൻഫ്രാസ്ട്രക്ചറിന്റെ ഉപസ്ഥാപനമാണ് റിലയൻസ് ഡിഫൻസ്.
റിലയൻസ് ഇൻഫ്രാസ്ട്രക്ചർ നേടുന്ന മൂന്നാമത്തെ പ്രതിരോധ കരാറാണിത്. നേരത്തേ ഫ്രഞ്ച് കമ്ബനികളായ ഡാസോ ഏവിയേഷൻ, തെയ്ല്‍സ് എന്നിവയുമായി കരാറില്‍ ഏർപ്പെട്ടിരുന്നു. റഫാല്‍ പോർവിമാനങ്ങളുടെ നിർമാതാക്കളാണ് ഡാസോ. റിലയൻസ് ഇൻഫ്രാ റിയല്‍ എസ്റ്റേറ്റ് മേഖലയിലും കരുത്തുകാട്ടുന്നുണ്ട്.
റിലയൻസ് ഇൻഫ്രാ ഓഹരി വില ഒരു മാസത്തിനകം 28 ശതമാനവും ഒരു വർഷത്തിനകം 95 ശതമാനവുമാണ് ഉയർന്നത്. റിലയൻസ് പവർ ഒരു മാസത്തിനകം 43 ശതമാനവും ഒരു വർഷത്തിനകം 134 ശതമാനവും മുന്നേറി. ഇനിയും മുന്നേറുമെന്നാണ് വിലയിരുത്തല്‍.
