ആഗോളതലത്തില്‍ മാമ്പഴത്തിന് ആവശ്യകത വര്‍ധിച്ചതോടെ കയറ്റുമതിയില്‍ നേട്ടമുണ്ടാക്കി എയര്‍ ഇന്ത്യ. 2025 ഏപ്രിലില്‍ 1,000 ടണ്‍ മാമ്പഴമാണ് എയര്‍ ഇന്ത്യ വിമാനങ്ങളിലൂടെ കടല്‍കടന്നത്. മേയ് മാസത്തിലെ കയറ്റുമതി ഇതിലും ഉയര്‍ന്നതായാണ് വിവരം. കഴിഞ്ഞ വര്‍ഷത്തെ അപേക്ഷിച്ച് ഈ സീസണില്‍ 15 ശതമാനമാണ് വര്‍ധന.ലണ്ടന്‍, ടൊറന്റോ എന്നിവിടങ്ങളിലേക്ക് എയര്‍ ഇന്ത്യ വിമാന സര്‍വീസുകള്‍ വര്‍ധിപ്പിച്ചതും മുംബൈ-ലണ്ടന്‍ റൂട്ടില്‍ ഉയര്‍ന്ന ശേഷിയുള്ള ബോയിങ് 777 വിമാനങ്ങളിലേക്ക് മാറിയതും ചരക്കുനീക്കം ഉയര്‍ത്താന്‍ സഹായിച്ചു.യുകെ, യുഎസ്, യുഎഇ, കാനഡ, ഫ്രാന്‍സ്, ജര്‍മനി, നെതര്‍ലന്‍ഡ്‌സ് എന്നീ രാജ്യങ്ങളാണ് ഇന്ത്യയില്‍ നിന്നുള്ള മാമ്പഴത്തിന്റെ പ്രധാന വിപണി. അല്‍ഫോന്‍സ, ബംഗനപ്പള്ളി, ദശേരി എന്നീ ഇനം മാമ്പഴങ്ങളാണ് പ്രധാനമായും കയറ്റി അയക്കുന്നത്.

ബ്രിട്ടീഷ് മൾട്ടിനാഷണൽ ഓയിൽ ആൻഡ് ഗ്യാസ് കമ്പനിയായ ബ്രിട്ടീഷ് പെട്രോളിയത്തിൻ്റെ (ബി.പി) കാസ്ട്രോൾ ലൂബ്രിക്കന്റ് ബിസിനസിൽ കണ്ണുവച്ച് കമ്പനികളുടെ നീണ്ട നിര. മുകേഷ് അംബാനിയുടെ റിലയൻസ് ഇൻഡസ്ട്രീസ്, അപ്പോളോ ഗ്ലോബൽ മാനേജ്മെന്റ്, ലോൺ സ്റ്റാർസ് ഫണ്ട്സ് എന്നിവയെല്ലാം താത്പര്യം പ്രകടിപ്പിച്ചതായാണ് വിവരങ്ങൾ. ഇതേകുറിച്ച് കമ്പനി ഔദ്യോഗിക പ്രതികരണം നടത്തിയിട്ടില്ല.
കമ്പനിയുടെ ഒരു ബിസിനസ് യൂണിറ്റ് വിൽക്കുന്നതുമായി ബന്ധപ്പെട്ട് പ്രൊട്ടൻഷ്യൽ ബയർമാരായ ബ്രൂക്ക് ഫീൽഡ് അസറ്റ് മാനേജ്മെന്റ് സ്റ്റോൺപിക്ക് പാർട്‌ണേഴ്സ‌് എന്നിവർക്ക് കമ്പനി വിവരങ്ങൾ കൈമാറിയതായും സൂചനകളുണ്ട്. ഏകദേശം 800-1000 കോടി ഡോളറിൻ്റെ (85,000 കോടി രൂപ) ഡീലായിരിക്കുമെന്നാണ് കമ്പനിയുമായി ബന്ധപ്പെട്ടവർ പറയുന്നത്.

ലോകത്തിലെ ഏറ്റവും വലിയ ഊർജ്ജ കമ്പനിയായ സൗദി ആരാംകോയും ബിസിനസ് ഭാഗികമായോ പൂർണമായോ ഏറ്റെടുക്കാൻ താത്പര്യം കാണിക്കുന്നുണ്ട്. എന്നാൽ ഈ ചർച്ചകളെല്ലാം പ്രാരംഭഘട്ടത്തിലാണ്. അടുത്ത കുറച്ച് ആഴ്‌ചകൾക്കുള്ളിൽ കമ്പനികൾ താത്പര്യപത്രം സമർപ്പിച്ചു തുടങ്ങിയേക്കും. ചില കമ്പനികൾ സംയുക്ത സംരംഭങ്ങൾ സ്ഥാപിച്ചുകൊണ്ടും ബിസിനസ് ഏറ്റെടുക്കാൻ ഒരുങ്ങുന്നുണ്ട്.

ലേല നീക്കങ്ങൾ പുരോഗമിക്കുമ്പോൾ ബാങ്കുകൾ (ഇൻവെസ്റ്റ്മെൻ്റ് ബാങ്കുകളും വായ്പാ സ്ഥാപനങ്ങളും) ബി.പിയുടെ ബിസിനസ് വാങ്ങാനായി 400 കോടി ഡോളർ വീതം ധനസഹായം നൽകാനും പദ്ധതിയിടുന്നുണ്ടെന്നാണ് സൂചനകൾ.
ഡോളർ, യൂറോ എന്നിങ്ങനെ വിവിധ കറൻസികളിലായി വായ്പവായ്പ അനുവദിക്കാനാണ് ഉദ്ദേശിക്കുന്നത്.
ബി.പിയുടെ കോര്‍പ്പറേറ്റ് പുനരുജ്ജീവനത്തിന്റെ ഭാഗമായാണ് കാസ്‌ട്രോള്‍-ബ്രാന്‍ഡിലുള്ള ബിസിനസില്‍ നയപരമായ മാറ്റം വരുത്തുന്നത്. കമ്പനിയുടെ ഏറ്റവും വലിയ ഇന്‍വെസ്റ്റ്‌മെന്റ് മാനേജ്‌മെന്റിന്റെ ഭാഗത്തു നിന്ന്‌ നയപരമായ മാറ്റങ്ങള്‍ ആവശ്യപ്പെട്ട് സമ്മര്‍ദ്ദമുണ്ട്.bഎണ്ണ വില കുറഞ്ഞ് നിൽക്കുന്ന സാഹചര്യത്തിലാണ് ബി.പിയുടെ തീരുമാനം. വില കുറയുന്നത് മറ്റ് വിജയകരമായ ആസ്‌തികളുടെ വിൽപ്പനയിലേക്ക് നയിക്കും. വാഹനങ്ങൾ, ഇൻഡസ്ട്രീസ് എന്നിവയ്ക്കുള്ള ലൂബ്രിക്കന്റ്സ് ഉൾപ്പെടെയുള്ളവ അടങ്ങിയതാണ് കാസ്ട്രോൾ ബിസിനസ്.
വൻകിട കോർപ്പറേറ്റുകൾ ബി.പിയുടെ ലൂബ്രിക്കന്റ് ബിസിനസിൽ കണ്ണുവെക്കുന്നുവെന്ന വാർത്തകൾ ഇന്ന് കാസ്ട്രോൾ ഇന്ത്യ ഓഹരികളുടെ വില ആറ് ശതമാനത്തോളം ഉയർത്തി.

ഇന്ത്യയിലെ ഇ-സ്‌പോർട്സ് ബിസിനസ് നടത്താനായി റിലയൻസിന്റെ പൂർണ്ണ ഉടമസ്ഥതയിലുള്ള ഉപസ്ഥാപനമായ റൈസ് വേൾഡ്‌വൈഡ് ബ്ലാസ്റ്റ്  ഇ-സ്‌പോർട്സുമായി സംയുക്ത സംരംഭം രൂപീകരിച്ചു. റിലയൻസും ബ്ലാസ്റ്റും ചേർന്ന് ഇന്ത്യയിൽ വിപണിയിൽ മുൻനിരയിലുള്ള ഇന്റലക്ച്വൽ പ്രോപ്പർട്ടികൾ (IPs) വികസിപ്പിക്കുകയും ആരാധകർക്കും കളിക്കാർക്കും ബ്രാൻഡുകൾക്കുമായി ബ്ലാസ്റ്റ് -ന്റെ ആഗോള ഐപി-കൾ ഇന്ത്യൻ വിപണിയിൽ അവതരിപ്പിക്കുകയും ചെയ്യും. ഡെൻമാർക്ക് ആസ്ഥാനമായുള്ള ബ്ലാസ്റ്റ്  എ പിഎസ് -ന്റെ പൂർണ്ണ ഉടമസ്ഥതയിലുള്ള ഉപസ്ഥാപനമാണ് ബ്ലാസ്റ്റ്. ലോകത്തിലെ ഏറ്റവും വലിയ ടൂർണമെന്റ് സംഘാടകരിൽ ഒന്നാണിത്. എപ്പിക് ഗെയിംസ്, വാൽവ്, റയറ്റ് ഗെയിംസ്, ക്രാഫ്റ്റൺ, യൂബിസോഫ്റ്റ് എന്നിവയുൾപ്പെടെ ലോകത്തിലെ ഏറ്റവും വലിയ ഗെയിം പ്രസാധകരുമായി ചേർന്ന് മുൻനിര ആഗോള ഇസ്‌പോർട്സ് പ്രോപ്പർട്ടികൾ സൃഷ്ടിക്കുന്നു.

ഭാവിയിൽ മികച്ച ടൈറ്റിലുകളും ഇവന്റുകളും ആകർഷിക്കുക എന്നതാണ് സംയുക്ത സംരംഭത്തിന്റെ  ലക്ഷ്യം. 600 ദശലക്ഷത്തിലധികം ഗെയിമർമാരുള്ള ഇന്ത്യ അതിവേഗം വളരുന്ന ഗെയിമിങ് വിപണിയാണ്, ഇത് ആഗോള ഗെയിമർമാരുടെ മൊത്തം എണ്ണത്തിന്റെ 18 ശതമാനമാണ്. ഇന്ത്യയിലെ ഇ-സ്‌പോർട്സ് വിപണി പ്രാരംഭ ഘട്ടത്തിലാണ്, ഇത് അതിവേഗം വളരുന്ന വിപണിയായി മാറുമെന്ന് പ്രതീക്ഷിക്കുന്നു. ഇന്ത്യ ഗവൺമെന്റ് ഇ-സ്‌പോർട്സിനെ “മൾട്ടി-സ്‌പോർട്‌സ് ഇവന്റ്” വിഭാഗത്തിന്റെ ഭാഗമായി പ്രഖ്യാപിച്ച് രാജ്യത്ത് ഔദ്യോഗികമായി അംഗീകരിച്ചിട്ടുണ്ട്.