വിറകുകള്‍ ഉപയോഗിച്ചുള്ള ബര്‍ണര്‍ കത്തിക്കരുതെന്ന് ബ്രിട്ടീഷുകാര്‍ക്ക് മുന്നറിയിപ്പ്. ഇത്തരത്തിലുള്ള പ്രവൃത്തി ചെയ്താല്‍ 100 പൗണ്ട് വരെ പിഴ ഒടുക്കേണ്ടി വരും എന്ന് മാത്രമല്ല, ക്രിമിനല്‍ റെക്കോര്‍ഡുകളില്‍ പേര് ചേര്‍ക്കപ്പെടുകയും ചെയ്യും. തണുപ്പു കാലത്ത്, നമ്മള്‍ കഴിയുന്ന പരിസരം ചൂടാക്കി നിലനിര്‍ത്തുന്നത് നല്ലതാണെങ്കിലും അമിതമായ കാര്‍ബണ്‍ പ്രസരണം അന്തരീക്ഷത്തില്‍ കൂടുതല്‍ അപകടങ്ങള്‍ സൃഷ്ടിക്കും. പാരിസ്ഥിതിക ആഘാതവും വലുതായിരിക്കും. അതുകൊണ്ടാണ് ഇപ്പോള്‍ വിറകടുപ്പുകള്‍ നിരോധിച്ചിരിക്കുന്നത്.
ആര്‍ബ്‌ടെക്കിലെ പരിസ്ഥിതി വിദഗ്ധര്‍ പറയുന്നത് വിറക് ബര്‍ണറുകള്‍ ഉപയോഗിക്കുന്നത് അപകടകരം തന്നെയാണ് ഏന്നാണ്. ഏകദേശം 1.5 ദശലക്ഷം ബ്രിട്ടീഷുകാര്‍ ഇപ്പോഴും വിറക് ബര്‍ണറുകള്‍ ഉപയോഗിക്കുന്നുണ്ട് എന്നാണ് കണക്കുകള്‍ പറയുന്നത്. ഇതിന്റെ വില്‍പന സര്‍ക്കാര്‍ നിരോധിച്ചിട്ടുണ്ട് എന്നു കൂടി ഓര്‍ക്കുക. 2021 ല്‍ ആയിരുന്നു ഹൗസ് കോള്‍ ആന്‍ഡ് വെറ്റ് വുഡ് ബര്‍ണറുകള്‍ ഇംഗ്ലണ്ടില്‍ നിരോധിച്ചത്.
പുതിയ നിയന്ത്രണങ്ങള്‍ അനുസരിച്ച് പുതിയ സ്റ്റൗവ്വുകളില്‍ നിന്നും വമിക്കുന്ന പുകയുടെ അനുവദനീയമായ അളവ് മണിക്കൂറില്‍ അഞ്ചു ഗ്രാം മുതല്‍ മൂന്നു ഗ്രാം വരെയാണ്. ഇത് അനുസരിച്ചില്ലെങ്കിലാണ് പിഴയടക്കേണ്ടി വരികയും ക്രിമിനല്‍ റെക്കോര്‍ഡില്‍ പേര് ചേര്‍ക്കപ്പെടുകയും ചെയ്യുന്നത്. അതുകൊണ്ടു തന്നെ, വിറക് ബര്‍ണറുകള്‍ ഉപയോഗിക്കുകയാണെങ്കില്‍, സര്‍ട്ടിഫൈഡ് വിറകുകള്‍ മാത്രം ഉപയോഗിക്കാനാണ് പരിസ്ഥിതി വിദഗ്ധര്‍ പറയുന്നത്. അതുപോലെ സ്റ്റൗ കൃത്യമായ ഇടവേളകളില്‍ പരിശോധിച്ച് കേടുപാടുകള്‍ ഇല്ല എന്ന് ഉറപ്പ് വരുത്തേണ്ടതും ഉണ്ട്.
