ബർമിങ്ങാം: എൽഎസ്കെ പ്രീമിയർ കപ്പ് 2025ന് ജൂൺ 15ന് ആരംഭിക്കും. ഇത്തവണ 16 ടീമുകളാണ് കിരീടത്തിനായി മാറ്റുരയ്ക്കുന്നത്. യുകെയുടെ വിവിധ ഭാഗങ്ങളിൽ നിന്നുള്ള ടീമുകൾ മത്സരത്തിൽ പങ്കെടുക്കും. ടൂർണമെന്റിലെ ഗ്രൂപ്പ് ഘട്ട മത്സരങ്ങൾ ജൂൺ 15, 29 തീയതികളിൽ വിരാളിലെ കാൽഡി ക്രിക്കറ്റ് ക്ലബ് ഗ്രൗണ്ടിൽ നടക്കും. സെമി ഫൈനൽ, ഫൈനൽ മത്സരങ്ങൾ ജൂലൈ ആറിന് സെന്റ് ഹെലെൻസിലെ പ്രെസ്‌കോട്ട് ആൻഡ് ഒഡിസ്സി ക്രിക്കറ്റ് ക്ലബ് ഗ്രൗണ്ടിലാണ് അരങ്ങേറുക. 2024ലെ ചാംപ്യൻമാരായ ഡാർക്ക് നൈറ്റ്സ്, മുൻ ചാംപ്യൻമാരായ എൽഎസ്കെ സൂപ്പർ കിങ്സ്, കഴിഞ്ഞ വർഷത്തെ റണ്ണറപ്പുകളായ മെഴ്‌സി സ്‌ട്രൈക്കേഴ്‌സ്, 2023 ലെ റണ്ണറപ്പുകളായ നൈറ്റ് മാഞ്ചസ്റ്റർ തുടങ്ങിയ പ്രമുഖ ടീമുകൾ ഇത്തവണ വൈറ്റ് ബോൾ ക്രിക്കറ്റ് മത്സരത്തിൽ പങ്കെടുക്കും.
ടൂർണമെന്റിലെ വിജയികൾക്ക് 1001 പൗണ്ടും ട്രോഫിയും രണ്ടാം സ്ഥാനക്കാർക്ക് 501 പൗണ്ടും ട്രോഫിയും സമ്മാനമായി ലഭിക്കും. മികച്ച പ്രകടനം കാഴ്ചവയ്ക്കുന്നവർക്ക് പ്ലേയർ ഓഫ് ദി മാച്ച്, ബെസ്റ്റ് ബാറ്റ്‌സ്മാൻ, ബെസ്റ്റ് ബൗളർ എന്നിവർക്കും ട്രോഫികൾ നൽകും. ടൂർണമെന്റിനെക്കുറിച്ച് കൂടുതൽ വിവരങ്ങൾ അറിയാൻ കൺവീനർ സജി ജോൺ (07771616407), കോഓർഡിനേറ്റർമാരായ ബിബിൻ യോഹന്നാൻ (07476698789), ജയ്മോൻ ജെയ്സൺ (07768497472) എന്നിവരെ ബന്ധപ്പെടാവുന്നതാണ്.
